पशुपति मन्दिर परिसरमा प्रहरीको कमान्ड पोस्ट, ६ हजार सुरक्षाकर्मी परिचालन

काठमाडौँ । पशुपतिनाथ मन्दिर परिसरमा आज महाशिवरात्रि पर्वका अवसरमा व्यापक सुरक्षा व्यवस्था मिलाइएको छ। पर्वका दिन करिब सात लाख भक्तजन आउने अनुमान गर्दै पशुपति क्षेत्र विकास कोष ले दर्शन व्यवस्थापनलाई चुस्त बनाएको जनाएको छ।

ठूलो सङ्ख्यामा दर्शनार्थी सहभागी हुने भएपछि स्थानीय प्रशासनले विशेष सुरक्षा योजना कार्यान्वयनमा ल्याएको छ। जिल्ला सुरक्षा समितिको निर्णयअनुसार योजना लागू गरिएको जिल्ला प्रहरी परिसर काठमाडौँ का प्रमुख एसएसपी रमेश थापाले जानकारी दिएका छन्।

मन्दिर परिसरभित्रै प्रहरीको कमान्ड पोस्ट स्थापना गरिएको छ। सम्भावित भीड व्यवस्थापन, बालबालिका हराउने घटना, चोरी–डकैती तथा अन्य अवाञ्छित गतिविधि नियन्त्रणका लागि उक्त पोस्टबाट निगरानी गरिनेछ। कमान्ड पोस्टको नेतृत्व एसपी पवन भट्टराईले गर्ने जनाइएको छ। पशुपति क्षेत्रमा मात्र ३ हजार ७ सय प्रहरी खटाइएको छ भने निर्वाचन सुरक्षामा रहेका प्रहरीलाई समेत परिचालन गरिएको छ।

समग्र सुरक्षाका लागि नेपाल प्रहरी, सशस्त्र प्रहरी बल नेपाल, राष्ट्रिय अनुसन्धान विभाग तथा काठमाडौँ महानगरपालिका अन्तर्गतका महानगर प्रहरीसहित करिब ६ हजार सुरक्षाकर्मी परिचालन गरिएको बताइएको छ।

शनिबार गृहमन्त्री ओमप्रकाश अर्याल, गृहसचिव राजकुमार श्रेष्ठ र काठमाडौँका प्रमुख जिल्ला अधिकारी ईश्वर राज पौडेल लगायतका अधिकारीहरूले स्थलमै पुगेर सुरक्षा तयारीबारे जानकारी लिएका थिए।

दर्शनलाई सहज बनाउन कोषले बिहानैदेखि मन्दिरका चारै वटा ढोका खुला गरेको छ। भक्तजनको सुविधालाई ध्यानमा राख्दै भीड व्यवस्थापन र सुरक्षालाई प्राथमिकतामा राखिएको प्रशासनले जनाएको छ।