हल्दीबारीमा डेङ्गि रोग बिरुद्द सामुहिक अभियान । लार्भा खोजीगरि नष्ट

झापा । डेङ्गी संक्रमणको जोखिम बढ्दै गएपछि हल्दीबारी गाउँपालिका २ स्थित हल्दीबारी बजार क्षेत्रमा डेङ्गी रोग नियन्त्रण तथा रोकथामका लागि व्यापक सचेतनामूलक अभियान सञ्चालन गरिएको छ। अभियानअन्तर्गत लामखुट्टेको लार्भा खोजी तथा नष्ट गर्ने कार्यसमेत गरिएको हो।

वडा नं. २ का वडा अध्यक्ष शुकलाल राजवंशीको नेतृत्वमा सञ्चालन गरिएको अभियानमा गाउँपालिकाको स्वास्थ्य शाखा, स्वास्थ्य चौकी, नेपाल रेडक्रस सोसाइटी, प्रहरी तथा स्थानीयवासीको सक्रिय सहभागिता रहेको थियो। कार्यक्रममा स्वास्थ्य शाखा प्रमुख पुष्कर निरौला, योजना शाखा प्रमुख राजन न्यौपाने, महिला स्वास्थ्य स्वयंसेविका, हल्दीबारी प्रहरी चौकीका प्रहरी तथा रेडक्रस उपशाखा हल्दीबारीका सभापति कर्णाखर प्रसाईलगायत सहभागी थिए।

अभियानका क्रममा बजार क्षेत्रका घर, पसल तथा सार्वजनिक स्थानहरूको अनुगमन गर्दै पानी जम्न सक्ने भाँडा, पुराना टायर, गमला, ड्रम, कुलरलगायतका स्थानमा डेङ्गी सार्ने लामखुट्टेको लार्भा खोजी गरी नष्ट गरिएको थियो। साथै स्थानीयवासीलाई घर तथा वरपरको वातावरण सफा राख्न, पानी जम्न नदिन र डेङ्गीबाट बच्न आवश्यक सावधानी अपनाउन आग्रह गरिएको थियो।
स्वास्थ्य शाखा प्रमुख पुष्कर निरौलाले डेङ्गी नियन्त्रणका लागि समुदायको भूमिका महत्वपूर्ण हुने बताउँदै प्रत्येक नागरिकले आफ्नो घर तथा वरपर नियमित निरीक्षण गरी लामखुट्टे हुर्किन सक्ने सम्भावित स्थानहरू हटाउनुपर्नेमा जोड दिए।

वडा अध्यक्ष शुकलाल राजवंशीले डेङ्गी नियन्त्रण कुनै एक निकायको मात्र जिम्मेवारी नभई सबैको साझा दायित्व भएको उल्लेख गर्दै यस्ता अभियान आगामी दिनमा समेत निरन्तर सञ्चालन गरिने बताए।
अभियानमा सहभागी सरोकारवाला निकाय तथा स्थानीयवासीले डेङ्गी नियन्त्रणका लागि सामूहिक प्रयासलाई थप प्रभावकारी बनाउँदै लैजाने प्रतिबद्धता व्यक्त गरेका छन्।