ज्ञानेन्द्र शाह काठमाडौँ आगमन: राजावादीद्वारा स्वागत

काठमाडौं। पूर्वराजा ज्ञानेन्द्र शाह झापाबाट काठमाडौँ आइपुगेका छन्। उनी कैलाश हेलिकप्टर प्रयोग गर्दै त्रिभुवन अन्तर्राष्ट्रिय विमानस्थलमा अवतरण गरेका हुन्। विमानस्थल बाहिर राजावादी समर्थकहरू भेला भएर उनको स्वागत गरेका थिए।

यसअघि उनी बुद्ध एयरको नियमित उडानमार्फत काठमाडौँ आउने कार्यक्रम तय भएको थियो। तर मौसम प्रतिकूल बनेपछि उडान ढिलाइ हुने अवस्था देखिएसँगै उनले हेलिकप्टरमार्फत यात्रा गर्ने निर्णय लिएका थिए। विमानस्थल सुरक्षा कार्यालयका एक अधिकृतले यसबारे जानकारी दिएका छन्।

सम्भावित प्रदर्शनका क्रममा अवाञ्छित गतिविधि हुनसक्ने अनुमान गर्दै प्रहरीले विमानस्थल क्षेत्र आसपास उच्च सतर्कता अपनाएको छ। सुरक्षा व्यवस्थालाई कडा पारिएको र अवस्थालाई नजिकबाट अनुगमन गरिएको जनाइएको छ।