दुर्गा प्रसाईको पक्राउमा राप्रपाको घोर आपती

काठमाडौं । ‘राष्ट्र, राष्ट्रियता, धर्म, संस्कृति र नागरिक बचाउ महाअभियान नेपाल’का संयोजक दुर्गा प्रसाईंलाई प्रहरीले शुक्रबार काठमाडौंको चाल्नाखेलबाट पक्राउ गरेको छ।
प्रसाईंको पक्राउप्रति प्रतिक्रिया दिँदै राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले फरक विचार र मान्यतालाई दबाउने नियतले उनलाई पटक पटक दुःख दिने गरी पक्राउ गरिएको आरोप लगाएका छन्।
लिङ्देनले जारी गरेको विज्ञप्तिमा भनिएको छ, “राष्ट्र, राष्ट्रियता, धर्म, संस्कृति र नागरिक बचाउ महाअभियान नेपालका संयोजक दुर्गा प्रसाईंलाई दुःख दिने, फरक मान्यतालाई निरुत्साहित तुल्याउने तथा दबाउने नियतबाट पटक पटक पक्राउ गरिएको घटनाप्रति राप्रपाको गम्भीर ध्यानाकर्षण भएको छ।”

उनले राज्यले व्यक्तिमाथि प्रतिशोध साँध्नु अनुचित मात्र नभई नागरिकले स्वतन्त्र रूपमा हिँडडुल गर्न, बोल्न, लेख्न र शान्तिपूर्ण विरोध गर्न पाउने संविधान प्रदत्त अधिकारसमेत कुण्ठित गरेको बताएका छन्।
यता, निर्वाचन आचारसंहिता उल्लंघन गरेको आरोपमा निर्वाचन आयोगले प्रहरीको साइबर ब्युरोलाई पत्राचार गरेपछि सोही आधारमा प्रसाईंलाई पक्राउ गरिएको प्रहरीको भनाइ छ। साइबर ब्युरोका प्रवक्ता प्रहरी उपरीक्षक दीपकराज अवस्थीले आयोगको पत्रका आधारमा आवश्यक अनुसन्धानका लागि पक्राउ गरिएको जानकारी दिएका छन्।